Vöruskiptahalli minnkar milli ára

Vöruskiptajöfnuður við útlönd reyndist nærri 78 milljarðar á fyrstu níu mánuðum ársins samkvæmt tölum sem Hagstofa Íslands birtir í dag. Það er 33 milljörðum króna minni halli en á sama tíma í fyrra.

Fluttar voru út vörur fyrir nærri 195 milljarða króna en enn fyrir 272 milljarða. Þegar aðeins er horft til septembermánaðar síðastliðins var vöruskiptahallinn óhagstæður um tæpa tíu milljarða en það er um þremur milljörðum króna meira en í fyrra miðað við sama gengi.

Fyrstu níu mánuði ársins var verðmæti vöruútflutnings nærri 15 milljörðum eða átta prósentum meira á föstu gengi en á sama tíma árið áður. Sjávarafurðir voru nærri helmingur alls útflutnings og var verðmæti þeirra tæplega eitt prósent minna en á sama tíma árið áður. Útfluttar iðnaðarvörur voru 43 prósent alls útflutnings og var verðmæti þeirra 28 prósentum meira en árið áður. Aukningu útflutnings má einna helst rekja til aukins álútflutnings en einnig varð aukning í útflutningi á kísiljárni.

Fyrstu níu mánuði ársins 2007 var verðmæti vöruinnflutnings 18,4 milljörðum eða sex prósentum minna á föstu gengi en á sama tíma árið áður. Mestur varð samdráttur í innflutningi á flugvélum og fjárfestingarvöru en á móti kom aukning í innflutningi á mat- og drykkjarvöru og annarri neysluvöru.