Vilja merkingar á erfðabreytta matvöru

Merkja verður erfðabreytta matvöru betur til þess að tryggja upplýsingagjöf til neytenda samkvæmt kröfu hóps miðjumanna á Norðurlandaráðsþinginu í Osló. Að mati miðjumanna gengur lagasetning á Norðurlöndum ekki nógu langt í þessum efnum.

Hópurinn telur ennfremur að það sé óviðunandi að dýraafurðir sem framleiddar eru með erfðabreyttu fóðri skuli ekki merktar sem slíkar. Bent er á að engin erfðabreytt ræktun fari fram á Norðurlöndum og vill hópurinn gera svæðið að neytendasvæði án erfðabreyttrar matvöru.

Að mati hópsins er hins vegar torvelt að hafa eftirlit með dreifingu slíkra matvæla og það skapi hættu á að norrænum ræktendum sé ekki lengur stætt á því að stunda vistvæna framleiðslu.