Dómur yfir bílaþjófi mildaður

Hæstiréttur mildaði dóm yfir karlmanni sem sakfelldur var fyrir að stela bíl og keyra hann í klessu. Maðurinn var dæmdur í átta mánaða skilorðsbundið fangelsi í Hæstarétti eins og í héraðsdómi en í héraðsdómi voru þrír mánuðir af dómnum óskilorðsbundnir.

Maðurinn var sem fyrr segir sakfelldur fyrir að stela bíl og aka honum þar til hann missti stjórn á honum með þeim afleiðingum að hann hafnaði utan vegar og gjöreyðilagðist. Þá var hann einnig sakfelldur fyrir þjófnað með því að hafa stolið úr bifreiðinni bílageislaspilara og MP3-spilara.

Maðurinn játaði brot sín skýlaust og áfrýjaði málinu einungis til refsilækkunar. Með brotunum rauf hann skilorð eldri dóms og var sá dómur tekinn upp og honum ákvörðuð refsing í einu lagi fyrir bæði málin. Í ljósi upplýsinga um betri hegðun mannsins og breyttar fjölskylduaðstæður og að teknu tilliti til þess að hann hafði bætt það tjón sem hann hafði valdið var fallist á það í Hæstarétti að refsingin yrði skilorðsbundin að öllu leyti.