Lögreglumenn á Selfossi sýknaðir eftir bumbuslagsmál

Tveir lögreglumenn frá Selfossi voru í dag sýknaðir af tæplega 16 milljón króna skaðabótakröfu frá konu sem heldur því fram að örorka sem hún hlaut eftir slys árið 2003 megi rekja til fyllerísláta lögreglumannanna.

Slysið varð á árshátíð starfsmanna embættis Sýslumanns á Selfossi árið 2003. Konan sem um ræðir er maki eins starfsmanns sýslumannsembættissins.

Málsatvik voru á þá leið að lögreglumennirnir tveir, en þeir báru báðir fyrir dómi að þeir hefðu verið töluvert ölvaðir þegar þetta átti sér stað, gerðu sér það að leik að reka bumbur sínar í hvorn annann. Að sögn lögreglumannann er þetta kallað "bumbuslagur". Konan segir að þegar lögreglumennirnir voru í bumbuslagnum hafi hún skyndilega fundið þungt högg dynja á hægri síðu sinni, við mjöðm. Hún hafi þá skollið í jörðina með þeim afleiðingum að úlnliðurinn brotnaði. Konan segir að einn lögreglumaðurinn hafi rekið bumbu sína í hinn með þeim afleiðingum að hann datt á hana.

Úlnliðsbrotið hefur haft þær afleiðingar að konan er nú 85% öryrki. Daginn eftir slysið komu báðir lögreglumennirnir á sjúkrahúsið þar sem konan lá, færðu henni blómvönd og báðust afsökunar á hegðun sinni kvöldið áður. Þá beitti annar þeirra sér fyrir því að henni yrði veittur styrkur úr félagasjóði löreglumanna í Árnessýsu.

Fyrir dómi báru þeir hins vegar að þeir bæru enga ábyrgð á því að konan hefði fallið í jörðina. Þar sem vitni gátu ekki gefið skýra mynd af því sem gerðist var eindreginn neitun lögreglumannanna tveggja tekin fram yfir fullyrðingu konunnar um að bumbuslagur lögreglumannana hefði orskað slysið.