Tólf ára gamall drengur slasaðist í árekstri við bíl

Tólf ára gamall drengur slasaðist þegar hann hjólaði harkalega á bifreið í Reykjanesbæ um klukkan tvö í dag. Drengurinn skall á bifreiðinni og mun hafa rotast en ekki skaðast að öðru leyti. Hann var ekki með reiðhjólahjálm. Bifreiðin skemmdist mikið við óhappið, eftir því sem fram kemur í tilkynningu frá lögreglunni.

Þá var ekið yfir fót á 4 ára gömlu barni við leikskólann Garðasel í Reykjanesbæ síðdegis í gær. Barnið hafði hlaupið frá leikskólanum og farið á milli tveggja bifreiða, sem lagt hafði verið við leikskólann. Barnið hafði síðan hlaupið á bifreið, sem ekið var samsíða bifreiðunum og lent undir bifreiðinni. Barnið hlaut opið beinbrot á sköflungi og flutti faðir barnsins það á Heilbrigðisstofnun Suðurnesja. Þaðan var það flutt á Landsspítalann í aðgerð.

Lögreglunni á Suðurnesjum var ekki tilkynnt um málið fyrr en klukkan átta. Lögreglan vill brýna það fyrir öllum að tilkynna tafarlaust til lögreglu um öll slys.