Skipulagstillögur á Kársnesi formlega slegnar út af borðinu

Á fundi skipulagsnefndar Kópavogs síðastliðinn þriðjudag var tekin formleg ákvörðun um að hafna skipulagstillögunum sem lagðar voru fram í júlí um breytt aðal-, deili- og svæðisskipulag fyrir hafnarsvæði Kársness. Þetta var staðfest á fundi bæjarráðs í dag. Tillögurnar féllu í grýttan jarðveg hjá íbúum á Kársnesinu og bárust bæjaryfirvöldum um 1700 athugasemdir vegna málsins. Ákveðið var að draga í land með uppbyggingu á nesinu og var sú ákvörðun staðfest formlega á þriðjudag.

Stjórn samtakanna Betri byggð á Kársnesi hefur sent frá sér tilkynningu þar sem félögum samtakanna og öðrum sem sendu inn athugasemdir er óskað innilega til hamingju með málalok.

„Þessi niðurstaða hefði aldrei orðið nema vegna þess gríðarlega fjölda íbúa sem ákvað að sitja ekki hjá og sætta sig við orðinn hlut, heldur að láta sannfæringu sína ráða og koma skoðunum sínum á framfæri. Við getum öll verið stolt af baráttuviljanum og samtakamættinum sem við íbúarnir í Vesturbæ Kópavogs sýndum í þessu máli og sem hefur nú verið endanlega staðfestur með með niðurstöðu Skipulagsnefndar 6. nóvember,"segir í tilkynningu stjórnarinnar.