Landsvirkjun skiptir yfir í dollara

Með gangsetningu Kárahnjúkavirkjunar og orkusölu til álvers Alcoa stóraukast þær tekjur sem Landsvirkjun fær í dollurum. Þannig er á næsta ári gert ráð fyrir að þrír fjórðu hlutar tekna Landsvirkjunar verði í dollurum frá stóriðjufyrirtækjum en aðeins fjórðungur verði í íslensku krónum frá almenningsveitum.

Þar sem Landsvirkjun býður út skuldabréf á markaði verður hún frá og með þessu ári að taka upp alþjóðlega reikningsskilastaðla en þeir kveða á um að gert sé upp í þeim gjaldmiðli sem er ráðandi í rekstri fyrirtækisins, að sögn fjármálastjórans, Stefáns Péturssonar.

Upptaka nýrra bókhaldsaðferða hefur fleiri breytingar í för með sér. Þannig lengist líftími virkjana í bókhaldinu þar sem þær verða afskrifaðar hægar. Stærsta breytingin er þó sú að langtímasamninga um orkusölu, sem tengdir eru álverði, þarf að verðmeta til framtíðar.

Hefði þessi aðferð verið notuð í fyrra hefði uppgjör ársins 2006 ekki sýnt þriggja og hálfs milljarðs hagnað heldur sextán milljarða hagnað og eigið fé hefði hækkað um tuttugu milljarða, úr 63 milljörðum. Verð á áli og spár um þróun þess munu því hafa meiri áhrif á uppgjör Landsvirkjunar framvegis.