Aron Pálmi glímir við áfallastreituröskun

Aron Pálmi Ágústsson sem setið hefur í fangelsi í 10 ár í Texasfylki í Bandaríkjunum segist glíma við áfallastreituröskun eftir fangavistina. Hann kom til landsins í morgun og segist feginn að vera loksins kominn heim eftir langt ferðalag.

Fyrir einni viku fékk Aron Pálmi Ágústsson frelsi eftir 7 ára fangelsisvist og þriggja ára stofufangelsi í Texas fylki frá fjórtán ára aldri. Undanfarna viku hefur hann dvalið á heimili foreldra sinna í Houston. Hann kom til landsins ásamt þremur móðursystrum sínum og fjölskyldum þeirra. Þrátt fyrir að vera þreyttur eftir langt ferðalag var ánægður með að vera kominn heim.

Aron Pálmi hefur ekki komið til landsins í rúman áratug. Hann stefnir á meira háskólanám við Háskóla Íslands bæði í sálfræði og íslensku en hann hefur lagt stund á sálfræðinám í Texas rúm tvö ár. Aron Pálmi segist ekki þekkja það að vera frjáls maður og segir fangavistina hafa haft afdrifarík áhrif á sig. Hann var nýlega greindur með áfallastreituröskun eftir fangelsisvistina. Kópavogsbær hefur boðið honum ókeypis sálfræðiaðstoð og hann hugleiðir að nýta sér það.

Níu tímum áður en Aron Pálmi og fjölskylda hans áttu að bóka sig í flug til Íslands á flugvellinum í Boston hafði dagsferð um borgina verið planlögð. Ræðismaður Íslands sem er Bandaríkjamaður bannaði þeim að yfirgefa flugstöðina og hótaði Aroni Pálma handtöku yfirgæfi hann staðinn samkvæmt fyrirmælum íslenska sendiráðsins. Aron Pálmi segir ræðismanninn hafa verið ófyrirleitinn. Albert Jónsson sendiherra í Washington vísar því alfarið á bug í samtali við fréttastofu að hafa gefið slík fyrirmæli og segist harma framkomu ræðismannsins.