Leit hætt, Þjóðverjarnir taldir látnir

Leitin að Þjóðverjunum Matthiasi Hinz og Thomasi Grundt hefur staðið yfir undanfarna viku og hafa sjálfboðaliðar lagt sig í mikla hættu á Öræfajökli. Aðstæður til leitar hafa verið með þeim erfiðustu sem björgunarmenn hafa kynnst hér á landi sagði þyrluflugstjórinn Benóný Ásgrímsson.

Þjóðverjarnir tveir létu engan vita hvert þeir hygðust fara og setti það leitarmenn í mikinn vanda. Vísbendingar leiddu þó leitarmenn smám saman á rétta slóð sem varð til þess að tjöld þeirra fundust. Ekkert hafði spurst til Þjóðverjanna í rúmar þrjár vikur þegar leit hófst. Við leitina í gær var meðal annar stuðst við vísbendingar frá þýskum miðli við leitina og auk þess höfð hliðsjón af upplýsingum frá íslenskum miðlum.

Reyndustu fjallamenn björgunarsveitanna leituðu á svæði sem tekur mið af tjaldbúðum þjóðverjanna fundust. Í gær hafði svæði sem er einn kílómetri í radíus umhverfis tjöldin verið fínkembt, en án árangurs.

Á annað hundrað björgunarsveitarmenn frá Slysavarnarfélaginu Landsbjörgu voru að störfum við leitina þegar mest var og sá tími sem menn hafa varið á jöklinum við leit er á sjötta þúsund. Auk þeirra sem tóku þátt í leitinni sjálfri var mikill fjöldi fólks sem kom að leitinni með óbeinum hætti.

Móðir annars mannanna er stödd hér á landi og var henni tilkynnt um að leitinni hefði verið hætt nú í morgun. Hún vildi koma á framfæri þakklæti til allra þeirra sem að leitinni stóðu.

Þá var samráð haft við stjórnvöld við þá ákvörðun að hætta leitinni. Víðir Reynisson hjá ríkislögreglustjóra telur að ekki hafi verið verjandi að halda leitinni áfram, meðal annars miðað við þá hættu sem var orðin á leitarsvæðinu en snjóað hefur á svæðinu undanfarið og snjóflóð hafa fallið.

Hann segir að enginn hafi verið sáttur við málalyktir því auðvitað hefði alltaf verið stefnt að því að finna mennina. Ákvörðun um að hætta leit hafi því verið gríðarlega erfið.