Tveimur stúlkum bjargað úr eldsvoða með snarræði reykkafara

Tveimur heimilismönnum á meðferðarheimilinu á Stuðlum í Reykjavík var bjargað með snarræði reykkafara slökkviliðsins í dag. Slökkviliðsstjórinn í Reykjavík telur að brunakerfi hafi bjargað fólkinu. Ekki er útilokað að um íkveikju hafi verið að ræða. Stuðlar eru meðferðarheimili fyrir unglinga.

Mikill eldur og gríðarlegur hiti voru í einni álmu hússins að Stuðlum þegar slökkvilið kom að og fengu slökkviliðsmenn strax upplýsingar um að tvær stúlkur væru lokaðar inni í þeirri álmu hússins þar reykurinn var hvað þéttastur. Reykkafarar fór þegar inn í húsið og náðu að bjarga stúlkunum.

Að sögn Jón Viðars Sæmundssonar varð mikið tjón í brunanum en hann sagði að brunakerfi hafi komið í veg fyrir að ekki fór verr.

Hann var einnig mjög ánægður með hversu vel tókst til með björgun stúlknanna tveggja. Þær voru báðar með meðvitund þegar þær komust undir bert loft.

Stúlkurnar fengu báðar reykeitrun og voru fluttar á slysadeild.

Starfsmaður á meðferðarheimilinu brann lítillega og fékk einnig snert að reykeitrun og fékk einnig aðhlynningu á slysadeild.

Eldsupptök eru óljós en ekki er talið útilokað að um íkveikju hafi verið að ræða.