Bíða þess að vatn í tengibrunni sjatni

Fjölmennir viðgerðarflokkar frá Orkuveitu Reykjavíkur bíða þess nú að heitt vatn sjatni í tengibrunni á aðalæð fyrir heitt vatn austan Reykjanesbrautar gegnt Smáralind, en þar kom í ljós bilun yfir rúmri klukkustund.

Fram kemur í tilkynningu frá Orkuveitunni að heitavatnslaust hafi verið í nýjum hverfum Kópavogs austan við Smáralind og í Vesturbæ Kópavogs. Þannig berst ekkert heitt vatn til beggja sundlauganna í bænum.

Eins og fram kom fyrr í morgun vakta lögreglumenn svæðið en um er að ræða hluta af gömlu aðalæðinni til Hafnarfjarðar sem verið er að taka úr notkun. Strax og hægt verður að komast niður í brunninn verður þessi gamli hluti aftengdur og þá verður hægt að hleypa heitu vatni aftur á. Ekki liggur fyrir hvenær það verður.