Síldarævintýri í Grundarfirði

Síldarævintýri er brostið á í Grundarfirði og stefna síldveiðiskipin þangað eitt af öðru til að vera klár í veiðarnar um leið og vind lægir.

Þar fengu tvö skip hátt í þúsund tonn hvor í aðeins tveimur köstum í gær sem þykir mjög gott. Auk þess er síldin í Grundarfirði mun stærri og betri en sú sem veiðst hefur í grennd við Vestmannaeyjar að sögn sjómanna.

En þrátt fyrir atganginn austan undir Kirkjufelli, svo til við bæjardyr Grundfirðinga, nær síldarstemmningin ekki inn í bæinn sjálfan því þótt skipin fylli sig fyrir utan eldhúsglugga heimamanna taka þau jafn harðan strikið í burt til löndunar á Austfjörðum, Hornafirði og Vestmannaeyjum og ekki er einum einasta titti landað í Grundarfirði.

Þessi mikla og óvænta síldarganga í Grundarfirði núna minnir á ofurgönguna þar í janúar síðastliðnum sem gleypti þar upp allt súrefni og gekk þar með af þorskeldinu í firðinum dauðu.