Hörð atlaga verður gerð að launamun kynjanna

Hækkun lægstu launa og hörð atlaga að launamun kynjanna er það sem koma skal í kjarabaráttunni, segir Grétar Þorsteinsson forseti ASÍ á ársfundi ASÍ sem hófst í morgun. Félagsmálaráðherra boðaði uppstokkun velferðarkerfisins og sagði mikilvægt að sporna gegn fátækt, leysa vanda húsnæðislausra og finna nýjar lausnir að nýju almannatryggingakerfi.

„Fyrir utan réttmæta kröfu um hækkun kaupmáttar er greinilegaeindreginn vilji til að hækka lægstu launin umtalsvert. Það hefur verið mikið launaskrið að undanförnu - en þeir sem sitja helst eftir við þær aðstæður er fólkið á strípuðu töxtunum - fólkið á lægstu laununum.

Hitt verkefnið sem samhljómur er um, er krafan um að færa taxta að greiddu kaupi. Það felur í sér að fá tryggingu fyrir því að þær kjarabætur og ávinningar sem launafólk hefur fengið til viðbótar við það sem samið er um í kjarasamningum, verði ekki tekið af aftur, þegar dregur úr þenslu," sagði Grétar Þorsteinsson. Þá sagði Grétar að ASÍ legði mikla áherslu á að gera harða atlögu að launamun kynjanna.

Jóhanna Sigurðardóttir félagsmálaráðherra flutti ávarp á fundinum og boðaði uppstokkun velferðarkerfisins. Takast þyrfti á við vandamál eins og það að um 2700 manns biðu eftir húsnæði í félagslega kerfinu.

Þá benti hún á að tölur frá 2004 sýndu að 27.600 manns yfir 16 ára aldri væru undir fátækramörkum. Það væri sameiginlegt verkefni ASÍ, verkalýðshreyfingarinnar, sveitarfélaga og ríkis að ráða bót á þessum vanda. „Það verður ekki lengur undan því vikist að auka hlutdeild þeirra fátæku í þjóðarauðnum," sagði Jóhanna.

Alls sitja um 300 manns frá 64 aðildarfélögum ASÍ ársfund sambandsins.