Segja Hafró stunda veiðar uppi í kálgörðum í Djúpinu

Smábátasjómenn á Vestfjörðum eru ævareiðir yfir því sem þeir kalla botntrollsveiðar á grunnsævi en frystitogarinn Örfirisey hefur stundað tilraunaveiðar í Ísafjarðardjúpi í nærri vikutíma.

Í yfirlýsingu stjórnar Eldingar, sem er félag smábátaeigenda á Vestfjörðum, er lýst yfir furðu á að Hafrannsóknastofnun standi að botnvörpuveiðum innfjarðar vegna veiðarfærarannsókna á þúsund tonna skipi í Ísafjarðardjúpi. „Veiðarnar eru í hróplegri mótsögn við þær friðunaraðgerðir sem stofnunin hefur staðið fyrir undanfarið," segir í yfirlýsingunni.

Smábátasjómenn segjast hafa heimildir fyrir því að ábúendur í Ísafjarðardjúpi hafi ekki notið næturhvíldar á meðan „verksmiðjutogarinn skarkaði upp undir kartöflugörðum þeirra," eins og segir í ályktun smábátafélagsins.

Í ályktuninni segir að stjórn Eldingar harmi þau mistök að leyfa eitt þúsund tonna verksmiðjutogara að toga inn eftir öllu Ísafjarðardjúpi í heila viku. Djúpið sé eitt af aðal uppeldissvæðum nytjastofna við Ísland.

Þess má geta að frystitogarinn Örfirisey er nú farinn úr Djúpinu og kominn á venjulega togaraslóð.