Dæmdar 26 milljónir króna í bætur vegna mistaka í fæðingu

Hæstiréttur dæmdi í dag íslenska ríkið til þess að greiða þrettán ára fötluðum dreng rúmar 26 milljónir króna í skaðabætur vegna mistaka sem urðu við fæðingu hans.

Á 41. viku meðgöngu móður kom í ljós að nær ekkert legvatn var til staðar, fóstrið sýndi smávægileg vaxtarfrávik og móðirin var með of háan blóðþrýsting. Hún var lögð inn tveimur dögum síðar og til að framkalla fæðingu og var drengurinn á endanum tekinn með keisaraskurði.

Í aðdraganda fæðingarinnar fékk drengurinn fósturköfnun og þá féll blóðsykur hans fljótlega eftir fæðingu. Fljótlega fór svo að bera á heilsufarsvandamálum og þroskafrávikum hjá drengnum og var varanleg örorka hans metin 100 prósent.

Hæstiréttur taldi að leggja yrði til grundvallar, meðal annars vegna ófullnægjandi skráninga, að mistök hefðu orðið í aðdraganda fæðingarinnar og að íslenska ríkið bæri fébótaábyrgð á þeim afleiðingum sem taldar yrðu stafa af fósturköfnun.

Matsmenn og læknaráð töldu að fleiri atriði en fósturköfnun í aðdraganda fæðingar kynnu að vera orsök fyrir fötlun drengsins. Taldi Hæstiréttur enn fremur að sönnunarbyrðin fyrir því að drengurinn hefði allt að einu orðið fyrir tjóni þótt engin mistök hefðu verið gerð hvíldi á íslenska ríkinu en ríkið hefði ekkert gert til að axla þá sönnunarbyrði.

Þar sem ekki þótti fært að láta drenginn gjalda fyrir ófullnægjandi sönnunarfærslu með því að ákveða bætur að álitum var skaðabótaskylda vegna alls þess tjóns sem fötlunin hafði valdið drengnum felld á íslenska ríkið.

Þegar litið var til þess að drengurinn yrði til frambúðar háður aðstoð annarra um helstu athafnir daglegs lífs þótti rétt að hækka miskabætur honum til handa um 35 prósent. Héraðsdómur hafði dæmt dregnum um 12 milljónir króna í bætur.