Starfshópur kanni allar hliðar samruna REI og GGE

Nýr meirihluti í borgarstjórn hyggst leggja fram tillögu á fundi borgarráðs sem hefst klukkan 9.30 um að stofna starfshóp undir stjórn Svandísar Svavarsdóttur sem fara á yfir samruna Reykjavik Eneregy Invest og Geysir Green Energy, en eins og kunnugt er varð málið fyrri meirihluta að falli.

Fram kemur í tillögunni að gert sé ráð fyrir að oddvitar allra lista í borgarstjórn Reykjavíkur eigi sæti í starfshópnum og þá verði leitað eftir sjónarmiðum fulltrúa annarra eigenda í Orkuveitunni, það er Borgarbyggðar og Akraness. Þá verði einnig haft samráð við sveitarfélög á starfssvæði Hitaveitu Suðurnesja þar sem OR og dótturfélög eiga umtalsverðan hlut í því fyrirtæki. Sigrún Elsa Smáradótti,r verðandi stjórnarformaður Orkuveitunnar, mun starfa með hópnum.

Starfshópurinn á að kanna allar hliðar samrunans með það að markmið að hagsmunum almennings og borgar verði gætt, löglega verði að verki staðið og öllum spurningum svarað sem þegar hafa komið upp og upp kunna að koma við skoðun málsins, meðal annars með tilliti til athugasemda og spurninga Umboðsmanns Alþingis. Þá á hópurinn að leggja fram heildarstefnu Reykjavíkurborgar í orkumálum.

Lagt er til að starfshópurinn hefji störf nú þegar og ráði sér starfsmann. Athygli vekur að starfshópurinn á að taka við af starfshópi fyrri meirihluta sem var að kanna hlutafélagavæðingu OR. Sá hópur laut forystu Björns Inga Hrafnssonar, borgarfulltrúa Framsóknarflokksins.

Auk kjörinna fulltrúa eiga innri endurskoðandi Reykjavíkurborgar, lögfræðilegur ráðgjafi, jarðhitafræðingur utan OR, sérfræðingur í fjárfestingum og fyrirhuguðum verkefnum REI, t.d. frá Jarðhitaskóla SÞ, að koma að vinnu hópsins. Gert er ráð fyrir að hópurinn skili niðurstöðum í áföngum og lokaskil verði eigi síðar en á aðalfundi Orkuveitunnar 1. júní 2008.