Rökstuddan grun um brot þarf til að heimila líkamsleit lögreglu

Sveinn Andri Sveinsson hæstaréttarlögmaður segir að lögreglan þurfi að hafa rökstuddan grun til að leita á fólki. Með hertum aðgerðum sínum fann lögreglan vopn og fíkniefni á fólki í gær í miðborginni. Sveinn Andri segir að borgarar hafi úrræði telji þeir á sér brotið við slíka líkamsleit.

Fólk á skemmtistöðum í miðborginni má búast við því að lögreglumenn taki það til hliðar og leiti á því.

Fíkniefnalögreglumenn fóru inn á alla helstu skemmtistaði í Reykjavík í nótt í félagi við þrjá menn úr sérsveitinni sem eru meðal annars þjálfaðir til að glíma við vopnaða og stórhættulega einstaklinga. Lögreglumennirnir leituðu á fólki sem þeim þótti grunsamlegt.

Að sögn lögreglu voru ólöglegir hnífar innanklæða á tveimur mönnum og fíkniefni á öðrum sex. Mennirnir verða ákærðir fyrir brot á vopnalögum og brot á fíkniefnalögum.

Sveinn Andri segir að lögreglan þurfi að hafa rökstuddan grun um að maður hafi gerst brotlegur við lög til að unnt sé að handtaka viðkomandi. Það sama gildi um leit í bifreið eða leit á einstaklingi að meintum fíkniefnum.

Sveinn Andri segir að lögregla geti leitað í heimahúsi einstaklings án dómsúrskurðar í þeim tilvikum þar sem hinn grunaði hefur gerst sekur um brot og honum hefur verið veitt eftirför í framhaldi af brotinu.

Sveinn Andri segir að gegnumsneitt vinni lögreglan störf sín vel hér. Hann segir að ef borgarar telji á sér brotið af lögreglu geti þeir kært framgöngu hennar til ríkissaksóknara eða krafið ríkið um skaðabætur vegna ólöglegra aðgerða.