Fórnarlömb stríðsátaka flýja til Íslands

Konum í Kólumbíu er nauðgað og þær búa við mikla neyð í því stríðsástandi sem þar geysar. Í mörgum tilfellum hafa þær enga fyrirvinnu og þurfa að afla allra nauðsynja fyrir sig og börn sín án hjálpar. Helga Arnardóttir, fréttamaður á Stöð 2, og Ingi Ragnar Ingason dagskrárframleiðandi fóru til Ekvadors í byrjun júní til að kynna sér ástand flóttamannakvenna frá Kólumbíu.

Helga og Ingi Ragnar voru í för með teymi frá Íslensku flóttamannanefndinni og Rauða krossi Íslands en Íslendingar taka á móti þrjátíu kólumbískum flóttamönnum frá Ekvador í ár. Þrír þeirra komu til landsins fyrr í sumar en tuttugu og sjö koma í dag.

Helga segir sláandi hversu neyð fólks í Kólumbíu er mikil. „Konurnar sem ég hitti hafa allar verið í samböndum við skæruliða. Sumar þeirra hafa verið giftar eða í ástarsamböndum við þá og svo hafa þær flúið mennina," segir Helga.

Helga segir að daglegt líf kvennanna sé mikil barátta. „Þær eru yfirleitt eina fyrirvinna heimilisins og á sama tíma þurfa þær að gæta að börnunum sínum," segir Helga. Hún segir að í mörgum tilfellum hafi þessar konur upplifað mikið líkamlegt, kynferðislegt og andlegt ofbeldi.

Helga segir að Flóttamannahjálp Sameinuðu þjóðanna fari þess á leit við Íslendinga að taka á móti þessum konum vegna þess að hér sé hefð fyrir því að mæður geti staðið á eigin fótum. „Allsstaðar í heiminum eru fordómar gagnvart einstæðum mæðrum. Kúltúrinn á Íslandi gerir hins vegar ráð fyrir að hér geti einstæðar mæður staðið sig," segir Helga.

Helga gerir sögu kólumbísku flóttakvennanna ítarleg skil í fréttaskýringaþættinum Kompás á Stöð 2 í kvöld.