Heildarmat á virkjanakostum liggi fyrir um mitt ár 2009

Þórunn Sveinbjarnardóttir umhverfisráðherra og Össur Skarphéðinsson iðnaðarráðherra hafa skipað verkefnastjórn sem á að undirbúa rammaáætlun um verndun og nýtingu náttúrusvæða. Er nefndinni ætla að skila skýrslu til ráðherranna með heildarmati á virkjunarkostum fyrir mitt ár 2009.

Ráðherrarnir kynntu verkefnastjórnina á blaðamannafundi í Þjóðmenningarhúsinu nú eftir hádegið. Fram kemur í tilkynningu frá umhverfisráðuneytinu að eftir að skýrslan liggi fyrir muni iðnaðarráðherra í samráði við umhverfisráðherra og verkefnisstjórnina leggja fyrir Alþingi fyrir lok ársins 2009 tillögu að rammaáætlun um verndun og nýtingu náttúrusvæða með áherslu á vatnsafls- og jarðvarmasvæði.

Leitað til almennings og hagsmunaaðila

Í rammaáætluninni er ætlunin að leggja mat á og flokka virkjunarkosti, jafnt vatnsafls og háhita, og áhrif þeirra á náttúrufar, náttúru- og menningarminjar, meðal annars með tilliti til orkugetu, hagkvæmni og annars þjóðhagslegs gildis, samhliða því að skilgreina og meta áhrif á hagsmuni allra þeirra sem nýtt geta þessi sömu gæði. Við vinnu rammaáætlunarinnar verður leitað til hagsmunaaðila og almennings, meðal annars með kynningarfundum og sérstakri vefsíðu.

Svanfríður Jónasdóttir, bæjarstjóri í Dalvíkurbyggð, hefur verið skipuð formaður verkefnisstjórnarinnar en auk hennar sitja þau Elín R. Líndal, oddviti Húnaþings vestra, Ellý Katrín Guðmundsdóttir, forstjóri Umhverfisstofnunar, Eydís Aðalbjörnsdóttir, verkefnisstjóri hjá Samtökum ferðaþjónustunnar, Freysteinn Sigmundsson, jarðfræðingur, Hjörleifur B. Kvaran, aðstoðarforstjóri Orkuveitu Reykjavíkur, Stefán Arnórsson, prófessor, Unnur Brá Konráðsdóttir, sveitarstjóri í Rangárþingi eystra, Þorkell Helgason, orkumálastjóri, Þorsteinn Tómasson, skrifstofustjóri í landbúnaðaráðuneytinu, og Þóra Ellen Þórhallsdóttir, prófessor, í verkefnastjórninni.