Staðfesti úrskurð Samkeppniseftirlitsins vegna Icelandair og Bláfugls

Áfrýjunarnefnd samkeppnismála hefur staðfest ákvörðun Samkeppniseftirlitsins í máli á hendur Icelandair Group og Bláfugli vegna samruna félaganna. Samkeppniseftirlitið ákvað í sumar að breyta skilyrðum sem sett voru í ákvörðun samkeppnisráðs vegna samruna FL Group, Bláfugls og og Flugflutninga árið 2005.

Með skilyrðunum samkeppnisráðs átti að tryggja að Bláfugl og Flugflutningar störfuðu að öllu leyti sjálfstætt áfram eftir samrunann og að hann raskaði ekki samkeppni. Jafnframt var tekið fram í ákvörðunarorðum samkeppnisráðs að tekin yrði afstaða til þess í síðasta lagi 1. júlí í ár hvort breyttar aðstæður á markaði fyrir flugflutninga til og frá landinu gæfu tilefni til endurskoðunar á skilyrðunum.

Samkeppniseftirlitið óskaði eftir gögnum frá Bláfugli, Flugflutningum, Icelandair Group og Icelandair Cargo í sumar en taldi þeim verulega áfátt þegar þau bárust. Vegna tafa á afgreiðslu málsins tók Samkeppniseftirlitið ákvörðun í málinu þann 28. júní um að Bláfugl og Flugflutningar yrðu fram til 1. október að kaupa flugafgreiðslu og aðra tengda þjónustu af öðrum en Flugþjónustunni á Keflavíkurflugvelli. Samkeppniseftirlitið myndi í síðasta lagi 1. október taka afstöðu til þess á ný hvort aðstæður á flugflutningamarkaði hefðu breyst og gæfu tilefni til endurskoðunar á skilyrðum samkeppnisráðs frá árinu 2005.

Deilt var um það fyrir áfrýjunarnefnd samkeppnismála hvort Samkeppniseftirlitið hefði haft heimild til að framlengja íhlutun í samruna félaganna með þessum hætti. Komst áfrýjunarnefndin að því að félögin sem áfrýjuðu, Icelandair og Bláfugl, bæru að hluta ábyrgð á því að endurskoðun á ákvörðun samkeppnisráðs dróst fram yfir 1. júlí. Hinn nýi frestur, 1. október, væri auk þess eðlilegur með hliðsjón af umfangi málsins. Ákvað áfrýjunarnefnd því að staðfesta úrskurð Samkeppniseftirlitsins frá því í sumar.