Hafnarstjórn og Hvalfjarðarsveit vilja bjóða sameiginlega í NATO-eigur

Faxaflóahafnir og sveitarstjórn Hvalfjarðarsveitar ræða nú saman um sameignlegt tilboð í fyrrum eigur NATO í Hvalfirði. "Okkar áhugi beinist fyrst og fremst að bryggjunni sem er til staðar þarna," segir Gísli Gíslason hafnarstjóri Faxaflóahafna í samtali við Vísi. "Við getum vel hugsað okkur bryggjuna sem lið í framtíðaráformum okkar."

Gísli Gíslason bendir á að þar sem um fyrrverandi hersvæði sé að ræða sé það ekki til á aðalskipulagi sem stendur. "Það þarf að skipuleggja svæðið upp á nýtt og því er mikilvægt að sá sem hyggst eignast svæðið og eigurnar á því hafi sveitarstjórnin með í ráðum í framtíðinni," segir Gísli. Hann bætir því við að mikill áhugi sé meðal sveitarstjórnarinnar að eiga samstarf við Faxaflóahafnir um þetta mál.

Bryggjan sem um ræðir mun í góðu standi og hún getur tekið við stærstu skipum. Gísli segir að gera þurfi töluverðar breytingar á henni til að minni skip geti lagst þarna að bryggju. "Og það eru önnur vandamál sem þarf að leysa eins og til dæmis rafkerfið sem er á bandaríska vísu," segir hann.