Segja yfirmann fjölskyldudeildar hafa verið rekinn fyrir ummæli

Oddviti Samfylkingarinnar í Kópavogi segir segir að yfirmaður fjölskyldudeildar Kópavogsbæjar hafi verið rekinn eftir að hún hélt því fram í fjölmiðlum að deildin væri undirmönnuð. Nokkrum dögum síðar var gerður við hana starfslokasamningur og hún lét af störfum samdægurs. Samfylkingarmenn kröfðust þess fyrir hálfum mánuði að fá að sjá starfslokasamninginn en við því hefur ekki verið orðið enn. Oddvitinn segist ekki trúa öðru en að hún fái að sjá samninginn á bæjarráðsfundi á morgun.

Forsaga málsins er sú að yfirmaður fjölskyldudeildar Kópavogsbæjar, sem annast barnaverndarmál, sagði í frétt í Ríkisútvarpinu að of fáir starfsmenn ynnu að barnaverndarmálum í Kópavogi og ekki væri hægt að sinna málum sem skyldi. Félagsmálastjóri bæjarins brást við og sagði starfsmanninn fara með rangt mál. Fljótlega eftir að umfjöllunin birtist var gerður starfslokasamningur við yfirmanninn, Kolbrúnu Ögmundsdóttur og lét hún af störfum samdægurs. „Við lesum ekkert annað í þetta en að hún hafi verið rekin," segir Guðríður Arnardóttir, oddviti Samfylkingarinnar í Kópavogi. Hún segist telja að með því að gera starfslokasamning við Kolbrúnu hafi yfirvöld viljað koma í veg fyrir að hún tjái sig um ástæðu brotthvarfsins. Í kjölfar þess að Kolbrún lét af störfum hafa síðan þrír af þeim sex starfsmönnum sem sinna barnarverndarmálum í bænum sagt upp störfum. Þegar hefur einn verið ráðinn til starfa og stöður hinna tveggja eru í auglýsingu.

Guðríður segir álagið á starfsmenn deildarinnar hafa verið mjög mikið og að það batni klárlega ekki með þessum fréttum. Hún bendir á að í núlegri starfsánægjukönnun sem gerð hafi verið innan félagsþjónustunar hafi fjölskyldudeildin komið illa út. Þó hafi komið fram í könuninni að starfsfólkið væri ánægt með yfirmann sinn, Kolbrúnu Ögmundsdóttur.