Fékk útsýnislóð út á spaðaásinn

Jónas Gestur Jónasson varð hlutskarpastur í útdrætti um eftirsótta lóð á Húsavík á dögunum. Alls sóttu 33 um lóðina, sem stendur á fallegum útsýnisstað í bænum, en dregið var úr umsækjendum með aðstoð spilastokks.

,,Ég var nú reyndar ekki á staðnum, en spaðaásinn var dreginn fyrir mig." sagði Jónas í samtali við Vísi. Hann bætti því við að þegar hefði verið búið að draga laufa ásinn tvisvar, en útdrátturinn fór fram með þeim hætti að þegar spil hafði verið dregið fyrir umsækjanda var það sett aftur í stokkinn.

Jónas segist ekki vera mikill spilamaður, en hann er löggiltur endurskoðandi hjá Deloitte á Ólafsvík. Aðspurður hvort hann sé að flytja til Húsavíkur, segist hann ekki viss um það ennþá. Hann ætli að byggja á lóðinni og hugsa sinn gang upp úr því.

Mikil gróska er í fasteignamarkaðnum á Húsavík, og hefur verð á fasteignum hækkað mikið þar undanfarið. Það tengist umræðum um mögulega álversbyggingu á Bakka, fyrir utan bæinn.