Rigningar seinka endurbótum á Þjóðleikhúsi

Hinar miklu rigningar sem verið hafa í undanfarna tvo mánuði hafa seinkað framkvæmdum við endurbætur á útiveggjum Þjóðleikhússins. Tinna Gunnlaugsdóttir þjóðleikhússtjóri segir að áformuð verklok séu nú í nóvember en upphaflega stóð til að verkinu yrði lokið í þessum mánuði.

"Ég vil tala skýrt fram að þetta hefur engin áhrif á starfsemi Þjóðleikhússins innan dyra, þar er allt með eðlilegum hætti," segir Tinna Gunnlaugsdóttir í samtali við Vísi. "Og hvað endurbæturnar utandyra varðar eru menn smátt og smátt að taka niður stillansana eins og fólk hefur tekið eftir."

Búið er að taka niður stillansana af framhlið hússins og óhætt að segja að endurbæturnar hafi tekist mjög vel til. Fram kemur hjá Tinnu að hið stóra rauða auglýsingaskilti á framhlið hússins verði tekið niður á næstunni og ekki sé ætlunin að auglýsa sýningar með þessum hætti í framtíðinni.

"Við höfum stækkað auglýsingagluggana við andyri hússins og þar verða leiksýningar kynntar í framtíðinni," segir Tinna.