Íslenskur árangur í baráttunni gegn malaríu

Notkun á flugnanetum með skordýraeitri hefur margfaldast í Gíneu-Bissá eftir að fyrirtæki á Íslandi hófu að styrkja tvíhliða verkefni í landinu í gegnum UNICEF, en malaría er talin vera einn helsti dánarvaldur bissáskra barna. Við lok árs 2006 sváfu 40% íbúa í hinu litla Vestur-Afríkuríki Gíneu-Bissá undir flugnaneti, en mælingar frá árinu 2000 sýna einungis 2-7% notkun.

Þetta kemur fram í nýlegri skýrslu UNICEF og samtaka sem berjast gegn útbreiðslu malaríu. Í skýrslunni kemur fram að Gínea-Bissá hefur náð miklum árangri í baráttunni gegn malaríu. Einnig kemur fram að flugnanet eru ein áhrifamesta forvörnin gegn malaríu og geta dregið úr dánartíðni barna um allt að 20% á svæðum þar sem malaría telst vera faraldur - eins og í Gíneu-Bissá.

Árið 2005 héldu Baugur Group, FL Group og Fons fjáröflunarkvöldverð til styrktar UNICEF í Gíneu-Bissá og greiddu framlögin sem söfnuðust m.a. fyrir 80% verkefnis sem miðaði að því að dreifa flugnanetum til allra barna undir 5 ára aldri í Gíneu-Bissá. Dreifing netanna fór aðallega fram í lok árs 2006 og litlum hluta var drieft í byrjun árs 2007. Gera má ráð fyrir að notkun flugnanetanna nú, við lok árs 2007, sé því yfir 40%.