Brunaútkall í samgönguráðuneytið

Slökkvilið höfuðborgarsvæðisins var kallað út skömmu eftir klukkan 10 í morgun þar sem brunaboði hafði farið í gang í samgönguráðuneytinu í Hafnarhúsinu við Tryggvagötu. Kviknað hafði í tusku í lyftuhúsi ráðuneytisins og reyndist ekki mikil hætta á ferðum.

Samkvæmt upplýsingum frá slökkviliðinu hafði tuskan legið á bremsubúnaði lyftunnar er kviknaði í henni. Við það að eldvarnarkerfið fór í gang læstist lyftan.

Fólk var að störfum á fjórðu og fimmtu hæð hússins og var því skipað út úr húsinu meðan slökkviliðið var að störfum. Eftir að slökkt hafði verið í tuskunni og lyftan loftræst var fólkinu hleypt inn í húsið aftur.