Eyþór senuþjófur í Cannes

Athafnamaðurinn Eyþór Guðjónsson hefur látið lítið fyrir sér fara að undanförnu eftir að hafa verið í sviðljósinu í kringum Hostel-hryllingsmyndina sem sló eftirminnilega í gegn.

Hann dustaði hins vegar rykið af smókinginum og stjörnubrosinu þegar kvikmyndaleikstjórarnir Eli Roth og Quentin Tarantino buðu honum að vera viðstaddur sérstaka hátíðarsýningu nýjustu kvikmyndar Tarantino, Death Proof. Eins og komið hefur fram í Fréttablaðinu hefur Tarantino mikinn hug á því að koma til landsins og vera viðstaddur frumsýningu myndarinnar. Og ef marka má orð Eyþórs eru meiri líkur en minni að af því verði. „Við ætlum jafnvel að reyna að fá einhverja af leikurunum með," segir Eyþór.

Athafnamaðurinn var á leiðinni á fasteignaráðstefnu í París þegar kallið kom frá Cannes og því var hægur leikur fyrir Eyþór að smella sér með lest til Frönsku rivíerunnar. Og hann var ekki fyrr kominn að gylltum ströndum Miðjarðarhafsins að lætin byrjuðu með tilheyrandi stjörnufans. „Ég fór í kvöldverð í boði Budweiser ásamt Weinstein-bræðrunum um borð í skútu sem þeir voru með í Cannes," segir Eyþór. Meðal þeirra sem heiðruðu framleiðendurnar voru Tarantino sjálfur og Kurt Russell, aðalleikari Death Proof, sem mætti með eiginkonu sína, Goldie Hawn, uppá arminn.

„Að honum loknum komu bílar frá kvikmyndahátíðinni og keyrðu okkur uppí höllina þar sem myndin var sýnd," útskýrir Eyþór sem reyndist svo sannarlega haukur í horni því aðalleikkonur myndarinnar voru á taugum yfir öllum þeim ljósmyndurum sem biðu þeirra fyrir utan bílinn. „Ég kenndi þeim bara nokkur dreglatrix og þá varð þetta allt í lagi," segir Eyþór en haft var á orði að íslenski sjarmörinn ætti þess eflaust kost að verða næsti James Bond þegar Daniel Craig legði byssuna á hilluna.