Stórkostlegur listamaður fallinn frá

Garðar Cortes óperusöngvari segir að með andláti Pavarottis sé stórkostlegur listamaður fallinn frá. Hann segist ekki hafa átt nein persónuleg samskipti við Pavarotti fyrir utan að hann hafi hitt hann í veislu í Ráðherrabústaðinum þegar hann kom til landsins. „Hann var með langfallegustu röddina sem ég hef heyrt," segir Garðar. Hann telur að ekki sé hægt að tala um að neitt tímabil á ferli hans sé framar öðrum. Ferillinn hafi allur verið hinn glæsilegasti. „Það er stundum talað um að hápunkturinn hafi verið á heimsmeistaramótinu í fótbolta árið 1990, þegar samstarf tenóranna hófst, en ég tel að ferill hans hafi allur verið jafn glæsilegur," segir hann.

Garðar segir að stundum hafi verið talað um einhverskonar ríg á milli tenóranna þriggja áður en samstarf þeirra hófst en það sé misskilningur.„Þeir virtu hvorn annan", segir Garðar. Garðar segir að platan King of the High C´s sé mjög eftirminnileg. Á henni hafi hann opinberað einstakan hluta raddarinnar.

Hér fyrir neðan má sjá myndir frá stórum stundum í lífi tenórsins