Vopnfirðingar fá betri höfn

Vopnafjarðarhöfn hefur í raun verið umbylt á undanförnum átta árum. Lokaáfangi framkvæmdanna stendur yfir þessa dagana en það er dýpkun nýrrar innsiglingar til að stærstu uppsjávarfiskiskipin komist inn en þannig er grundvöllur byggðarinnar treystur. Nýr tvöhundruð metra viðlegukantur er meðal hafnarbótanna sem kosta sitt, en Þorsteinn Steinsson sveitarstjóri segir heildarkostnað í kringum einn milljarð króna. Þrír hólmar umlykja höfnina og var aðalinnsiglingin áður milli Miðhólma og Skiphólma. Þeirri rennu var lokað með garði til að skapa skjól.