Ölvaður og óviðræðuhæfur varðist handtöku

Ölvaður og óviðræðuhæfur ökumaður reyndi að hlaupa frá lögreglunni eftir að hann lenti í umferðaróhappi í nótt. Er lögreglan náði í skottið á honum varðist hann handtöku en gistir nú fangageymslur.

Hinn ölvaði ók á stjórnkassa fyrir umferðarljós á mótum Kringlumýrarbrautar og Miklubrautar. Þegar maðurinn komst ekki lengra á bíl sínum hljóp hann á brott út í náttmyrkrið.

Vegfarendur gátu gefið góða lýsingu á manninum og veitti lögregla honum eftirför. Hún kom að honum við Kringluna. Þar varðist maðurinn handtöku að sögn lögreglu og var vistaður með hinum í fagnageymslu.

Hann verður yfirheyrður nú fyrir hádegið en maðurinn var ekki vel viðræðuhæfur í nótt sökum ölvunarástands.