Mótmæla misskiptingu í samfélaginu

Ríkisstjórnin þarf að útrýma fátækt á Íslandi og tryggja jafnræði í samfélaginu. Þetta kemur fram í ályktun opins fundar Vinstrihreyfingarinnar græns framboð sem haldinn var í Vestmannaeyjum á fimmtudaginn.

Í ályktuninni segir ennfremur að á undanförnum árum hafi hvers konar misrétti í íslensku samfélagi aukist. Launamunur hafi aukist, jafnrétti á ýmsum sviðum sé orðin tóm og félagslegt öryggi hafi minnkað.

Þá segir ennfremur í ályktuninni að nú sé svo komið að sannarlega búi tvær þjóðir í landinu. Þeir sem búa við alsnægtir og þeir sem búa við þröngan kost, öryggisleysi og mismunun. Íbúar landsbyggðarinnar sitji ekki við sama borð og íbúar höfuðborgarsvæðisins um menntun, samgöngur, fjarskipti, heilsugæslu og löggæslu. Þessu mótmælir fundurinn og krefst þess að horfið verði frá þeirri stefnu sem skapað hefur og viðhaldið slíku þjóðfélagi.