Guðlaugur Þór segir íslenska lyfjamarkaðinn ekki virka sem skyldi

Heilbrigðis- og tryggingamálaráðherra, Guðlaugur Þór Þórðarson, átti í gær og fyrradag fundi með tveimur framkvæmdastjórum Evrópusambandsins. Guðlaugur hitti þá Günter Verhaugen sem fer með lyfjamál og Makros Kyprianou, sem fer með heilbrigðismálin fyrir hönd framkvæmdarstjórnarinnar. Fundirnir fóru fram í Brussel.

„Á fundunum var staða lyfjamála á innri markaði Evrópusambandsins, sem nær einnig til Íslands á grundvelli samningsins um Evópska efnahagssvæðið, rædd," segir í tilkynningu frá ráðuneytinu. Vakti heilbrigðisráðherra sérstaka athygli á vanda sem minni markaðssvæði eins og Ísland eiga við að glíma í því sambandi en Guðlaugur benti á að markaðurinn væri ekki að virka sem skyldi á Íslandi og öðrum minni markaðssvæðum.

„Lyfjaverð væri hærra á Íslandi en gerist og gengur á hinum Norðurlöndunum og langt yfir meðallyfjaverði í ríkjum Evrópusambandsins, auk þess sem lyfjaframboð á Íslandi væri með öðrum hætti en í stærri ríkjum markaðssvæðisins," segir í tilkynningunni.

Þá segir að í máli framkvæmdastjóranna beggja hafi komið fram mikill skilningur á þessum vanda.

„Meðal annars var rætt um stofnun sérstakrar vinnunefndar til að móta tillögur að lausn vandans og leggja fyrir Framkvæmdastjórn ESB. Ísland mun fá aðild að þessari vinnunefnd sem mun væntanlega starfa á grundvelli þeirrar vinnu sem nú fer fram á vettvangi Evrópusambandsins varðandi lyfjaiðnaðinn og lyfjamarkaðinn í heild sinni."

Guðlaugur Þór vakti einnig athygli á því að breytingar á evrópsku lyfjalöggjöfinni, sem áttu sér stað árið 2004, væru enn ekki komnar í EES samninginn.

„Voru aðilar sammála um að hraða bæri því ferli sem kostur væri, enda væri þar að finna aukinn sveigjanleika sem hægt væri að nýta til að koma að einhverju leyti til móts við umræddan vanda á litlum markaðssvæðum."