Þurfti að flýta greiðslum til Arnarfells svo tímaáætlun stæðist

Landsvirkjun þurfti að flýta greiðslum til verktakafyrirtækisins Arnarfells í sumar vegna bágs fjárhags. Stjórn Landsvirkunar hefur fjallað um fjárhagsstöðu Arnarfells að undanförnu og telur að fyrirtækið standi nú í skilum við alla lánadrottna sína.

Arnarfell er næst stærsta verktakafyrirtækið við Kárahnúkjavirkjum um þessar mundir með 350 starfsmenn. Impregilo er þó langstærsti verktakinn við virkjunina með á annað þúsund starfsmenn og sér um 60 % hluta verksins. Arnarfell byggir nú hraunaveitu við jökulsá í Fljótsdal en bágur efnahagur fyrirtækisins hefur verið til umræðu á stjórnarfundum Landsvirkjunar.

Sigurður Arnalds talsmaður Landsvirkjunar fyrir Kárahnjúkavirkjun segir að Arnarfell hafi átt í fjárhagserfiðleikum í sumar en nú sé fyrirtækið komið í skil við alla sína lánadrottna.

Sigurður segir Arnarfell ekki stefna í gjaldþrot en Landsvirkjun hafi þurft að flýta verkgreiðslum til fyrirtækisins svo áætlanir stæðust.

Nú sé Arnarfell nokkurn veginn á áætlun með verkið en það þurfi að halda á spöðunum til að ná settum tíma.