Framkvæmdir við stækkun Glerártorgs stöðvaðar

Framkvæmdir við stækkun verslunarmiðstöðvarinnar Glerártorgs á Akureyri hafa verið stöðvaðar. Vinnustöðvunin er tilkomin vegna ágreinings um niðurrif gamals húss.

Fyrir stundu sendi Akureyrarbær frá sér fréttatilkynningu þar sem segir að samkvæmt nýjum úrskurði úrskurðarnefndar skipulags- og byggingamála eigi fyrirtækið Svefn og heilsa, sem þarna á hús, enn óbein eignarréttindi í lóðinni samkvæmt eldra deiliskipulagi.

Byggingaleyfi sé því tímabundið fellt úr gildi meðan sátta sé leitað. Fundað verður á morgun vegna málsins en sýnt virðist að framkvæmdir geti ekki hafist á ný fyrr en í fyrsta skipti á fimmtudag.

Stækka á verslunarmiðstöðina Glerártorg um næstum helming og er því um mikla og mannnmarga framkvæmd að ræða. Tap verktaka á vinnulausum degi er því verulegt.