Fulltrúar eigenda OR hittast aftur eftir viku

Á eigendafundi Orkuveitu Reykjavíkur, sem fram fór fyrr í kvöld, voru teknar aftur ákvarðanir á umdeildum eigendafundi 3. október sl. varðandi samruna Reykjavik Energy Invest og Geysis Green Energy.

Jafnframt fólu eigendur stjórnarformanni Orkuveitunnar að ræða við aðra eigendur Reykjavík Energy Invest og Geysi Green Energy um stöðu og framhald málsins og að gera eigendum grein fyrir framgangi viðræðna á eigendafundi sem haldinn verður eftir viku.

Þá fólu eigendur forstjóra Orkuveitu Reykjavíkur að leita sátta í málaferlum Svandísar Svavarsdóttur gegn Orkuveitu Reykjavíkur vegna lögmætis fundarins 3. október.

Eigendafundinn sátu sem fulltrúar eigendanna þriggja Dagur B. Eggertsson borgarstjóri fyrir hönd Reykjavíkurborgar, Gísli S. Einarsson bæjarstjóri frá Akraneskaupstað og Páll S. Brynjarsson sveitarstjóri frá Borgarbyggð. Auk þess sátu fundinn stjórnarmenn Orkuveitu Reykjavíkur, Bryndís Hlöðversdóttir formaður, Ástráður Haraldsson, Jón Sigurðsson, Gunnar Sigurðsson, Júlíus Vífill Ingvarsson og Kjartan Magnússon ásamt forstjóra Orkuveitunnar, Hjörleifi B. Kvaran.

Allar tillögur sem fyrir fundinum lágu voru afgreiddar samhljóða, þar á meðal svo hljóðandi bókun eigendanna:

Í ljósi þess umróts sem verið hefur um starfsemi Orkuveitu Reykjavíkur, lýsir eigendafundur OR því yfir að eigendur standa einhuga á bak við fyrirtækið og starfsfólk þess í þeim mikilvægu og vandasömu verkefnum sem Orkuveitan og starfsfólk hennar vinnur.

Þá kynnti borgarstjóri fundinum bókanir sem borgaryfirvöld hafa gert varðandi Orkuveitu Reykjavíkur m.a. að hann myndi beita sér fyrir viðræðum ríkis, sveitarfélaga og meðeigenda í Hitaveitu Suðurnesja um framtíð fyrirtækisins í því skyni að tryggja að auðlindir og almenningsveitur verði í eigu almennings. Enn fremur lagði borgarstjóri fram bókun borgarráðs Reykjavíkur varðandi upplýsingaöflun um fyrirætlanir OR, virkjanaáform, stöðu framkvæmda, viljayfirlýsinga og samninga, auk yfirlits yfir þá aðila sem hafa óskað eftir viðræðum um orkukaup.

Fulltrúar eigenda Orkuveitunnar munu hittast aftur föstudaginn 23. nóvember og fara þá á ný yfir stöðu mála.