Fáum allt að hálfrar milljón tonna afla úr deilistofnum

Veiðar Íslendinga á deilistofnum á Norðaustur Atlantshafi gætu numið allt að hálfri milljón tonna á næsta ári. Þetta kemur fram í frétt sjávarútvegsráðuneytisins um ársfund Norðaustur-Atlantshafs fiskveiðinefndarinnar, NEAFC sem lauk í dag.

Á fundinum var m.a. fjallað um stjórn veiða á kolmunna, úthafskarfa, norsk-íslenskri síld og makríl fyrir árið 2008 auk verndunar viðkvæmra hafsvæða og aðgerða gegn ólöglegum og óábyrgum fiskveiðum.

Á fundinum náðist samkomulag um stjórn kolmunnaveiða sem öll veiðiríkin samþykkja. Á árinu 2005 náðist strandríkjasamkomulag um stjórn veiðanna, sem batt enda á stjórnlausar ofveiðar fyrri ára. Ákveðið var að á árinu 2008 verði heimilað að veiða alls 1.266 milljónir tonna af kolmunna, þar sem hlutur Íslands er tæp 203 þúsund tonn, eins og samþykkt var á fundi strandríkjanna í október.

Ekki náðist samkomulag um stjórn veiða á úthafskarfa á Reykjaneshrygg. Á fundinum var hins vegar ákeðið að strandríkin bjóði til fundar með öllum aðildarríkjum NEAFC 15.-16. janúar 2008. Á þeim fundi er stefnt að því að ná samkomulagi um stjórn veiðanna, þar með talið um heildaraflamark og skiptingu aflamarks meðal allra aðildarríkja NEAFC.

Á fundinum náðist samkomulag um 14.500 tonna úthafskarfaafla í síldarsmugunni. Að mati Alþjóða hafrannsóknaráðsins, ICES, er stofninn talinn standa illa og hefur ráðið lagt til að engar beinar veiðar séu stundaðar úr honum. Í ár voru veidd um u.þ.b. 15.000 tonn af úthafskarfa á svæðinu.

Á fundinum lögðu Norðmenn fram tillögu um að engar veiðar yrðu heimilar á þessu ári og meðafli við aðrar veiðar yrði ekki meiri en 1%. Íslendingar studdu tillögu Norðmanna, enda var hún í samræmi við vísindaráðgjöf. Fulltrúar Færeyinga, Rússlands og Evrópusambandsins gátu ekki stutt tillögu Norðmanna um engar veiðar og varð niðurstaðan sú að leyfa veiðar á 14.500 tonnum af úthafskarfa í síldarsmugunni á tímabilinu 1. september til 15. nóvember 2008 og meðafli á karfa fari ekki yfir 1% við aðrar veiðar.

Á grunni samkomulags strandríkja um stjórn veiða úr norsk-íslenska síldarstofninum var ákveðið að heildaraflamark fyrir árið 2008 yrði 1.518.000 tonn. Í hlut Íslands á árinu 2008 koma 220.262 tonn.