Breytingar í heilbrigðisráðuneytinu

Nýtt starfsskipulag tók gildi í heilbrigðis- og tryggingamálaráðuneytinu í dag þar sem skrifstofum ráðuneytisins var skipt í verkefnasvið með tiltekið skilgreint hlutverk.

Fram kemur í tilkynningu frá heilbrigðisráðuneytinu að breytingarnar taki mið af áherslum heilbrigðisráðherra um að styrkja stefnumótunarhlutverk ráðuneytisins. Eftir breytingar skiptist ráðuneytið í yfirstjórn, þrjú svið og þjónustuskrifstofu. Sviðin þrjú eru svið stefnumótunar heilbrigðismála, svið fjármála og rekstrar og svið laga og stjórnsýslu. Skrifstofur ráðuneytisins heyra hver undir sitt svið.

Berglind Ásgeirsdóttir er ráðuneytisstjóri, en þær þrjár sem stýra verkefnasviðum heilbrigðis- og tryggingamálaráðuneytisins eru: Ragnheiður Haraldsdóttir hefur yfirumsjón með stefnumótun í heilbrigðismálum, Svanhvít Jakobsdóttir hefur yfirumsjón með fjármálum og rekstri og Vilborg Þ. Hauksdóttir hefur yfirumsjón með verkefnum laga-og stjórnsýslu.