Rannsókn lokið á E.Coli faraldri

Sóttvarnalæknir hefur lokið rannsókn á E.Coli smiti sem varð til þess að níu einstaklingar sýktust af bakteríunni hér á landi í byrjun september. Talið er líklegt að fólkið hafi smitast eftir að hafa borðað innflutt salat frá Hollandi.

Samkvæmt Farsóttafréttum sóttvarnalæknis greindust á sama tíma 36 einstaklingar í Hollandi með sams konar sýkingu og á Íslandi. Samanburður á íslenskum og hollenskum bakteríustofnum sýndi að sami stofn olli sýkingunum í báðum löndunum.

Þá segir ennfremur í fréttum sóttvarnalæknis að grunur hafi fljótlega beinst að pökkuðu jöklasalati. Sýnataka fór fram hjá framleiðendum í Hollandi en allar ræktanir voru hins vegar neikvæðar fyrir E.Coli. Faraldurinn virðist þó vera genginn yfir í báðum löndunum samkvæmt sóttvarnalækni.