Aukning á HIV-sýkingu á Íslandi í tengslum við fíkniefnaneyslu

Lifrabólgu B og HIV-sýkingum í tengslum við fíkniefnaneyslu hefur fjölgað hér á landi á þessu ári samkvæmt Farsóttafréttum sóttvarnalæknis. Aukningin stafar fyrst og fremst af auknu smiti meðal Íslendinga.

Fram kemur í Farsóttafréttum að þessu ári hafi 12 einstaklingar greinst með sýkingu af völdum HIV veirunnar. Hjá sex þeirra virðast vera tengsl við fíkniefnaneyslu og þar af reyndust fjórir að auki vera með lifrabólgu B.

Þá hafa 38 einstaklingar greinst með lifrabólgu B á þessu ári þar af sautján Íslendingar. Í níu tilfellum tengjast smitin fíkniefnaneyslu þar sem sprautur og nálar koma við sögu.

Fram kemur í Farsóttarfréttum að þar sem hálfur annar áratugur sé liðinn frá síðasta lifrabólgu B faraldri meðal fíkniefnaneytenda hér á landi megi búast við að stór hópur þeirra sem nú hafa smitast sé óvarinn af mótefnum gegn sjúkdóminum.