Horfir til landauðnar innan velferðarþjónustunnar

Ef starfsfólki í almannaþjónustu verður ekki greitt kaup og búið að því eins og best gerist á launamarkaði horfir til landauðnar á mikilvægum sviðum velferðarþjónustunnar. Þetta sagði Ögmundur Jónasson, formaður BSRB, í ræðu sinni á aðalfundi bandalagsins í dag. 

Kjaramál voru þar til umræðu og ályktaði bandalagið um að verulegar kjarabætur þyrfti til handa þeim sem ynnu í almannaþjónustunni í komandi kjarasamningum. „Ef ekkert verður að gert blasir við neyðarástand," sagði Ögmundur.

Í ályktun BSRB er bent á misskipting hafi aukist í íslensku samfélagi og það gangi í berhögg við réttlætiskennd fólks. Öflug velferðarþjónusta sé mikilvæg forsenda stöðugleika og ljóst sé að stórátak þurfi til þess að efla grunnþjónustu samfélagsins ef ekki eigi illa að fara. Mjög alvarlegar blikur séu nú á lofti.

„Á sjúkrahúsum og dvalarheimilum fyrir aldraða, á stofnunum fyrir fatlaða, innan löggæslunnar og víðar í grunnþjónustu samfélagsins verður sífellt erfiðara að ráða fólk til starfa á þeim kjörum og við þau skilyrði sem starfsfólki eru búin. Manneklan veldur síðan enn meira álagi á starfsfólkið og vinda erfiðleikarnir þannig upp á sig. Samfélagið þarf að horfast í augu við þá staðreynd að ef lengur verður látið reka á reiðanum stefnir í óefni, ef ekki neyðarástand," segir í ályktun BSRB.

Þá telur BSRB að taka þurfi meira tillit til fjölskyldunnar þegar samið sé um kaup, vinnutíma og önnur kjör því traustar atvinnutekjur og rúmur frítími geti skipt sköpum fyrir gott fjölskyldulíf.

Þá segir BSRB að kynbundið launamisrétti sé óþolandi og fer fram á það að það verði upprætt. BSRB leggur enn fremur áherslu á að kjör vaktavinnufólks verði bætt verulega með hækkun launa og styttri vinnuskyldu.