Helmingur kynferðisbrota á heimili eða einkalóð

Helmingur kynferðisbrota sem kærð voru á fyrstu tíu mánuðum ársins áttu sér stað á heimili eða einkalóð samkvæmt bráðabirgðatölum úr afbrotatölfræði Ríkislögreglustjóra í október. Þar kemur einnig fram að 15 prósent brotanna átti sér stað á akbraut eða á bifreiðastæði og sex prósent á einhvers konar samkomustað.

Tölverð umræða hefur verið um kynferðisbrot að undanförnu en tölur Ríkislögreglustjóra sýna að fjöldi þeirra er svipaður á fyrstu tíu mánuðum þessa árs og síðustu tvö ár, eða á bilinu 230-240. Flest þeirra eru skráð í janúar eða um 40. Þá bendir lögregla á að fá fórnarlömb kynferðisbrota kæri þau til lögreglu.

Enn fremur kemur fram í tölum Ríkislögreglustjóra að hraðakstursbrot í október hafi verið nærri 3.400 sem er um þriðjungi meira en í sama mánuði í fyrra. Hins vegar voru þjófnaðarbrot, eignaspjöll, innbrot og fíkniefnabrot færri en í fyrra. Ölvunarakstursbrot reyndust 153 í október sem jafngildir því að fimm menn séu teknir að meðaltali á dag ölvaðir undir stýri.

Þegar rýnt er í tölfræði einstakra lögregluembætta kemur fram að umferðarlagabrot í umdæmi lögreglunnar á Akranesi voru nærri þrefalt fleiri í október í ár en á sama tíma í fyrra. Þá reyndist um gríðarlega fjölgun umferðarbrota hjá lögreglunni á Snæfellsnesi á milli ára eða úr 17 í október 2006 í rúmlega 1200 í október í ár. Þetta má rekja til tveggja stafrænna hraðamyndavéla sem settar hafa verið upp í umdæminu.

Tölfræði Ríkislögreglustjóra sýnir enn fremur að 85 prósent fíknefnabrota eru skráð hjá lögreglunni á höfuðborgarsvæðinu og í sumum umdæmum eru engin fíkniefnamál skráð.