Íslendingar hlusta ekki á Seðlabankann

Velta í dagvöruverslun, þ.e. verslun með matvörur og aðrar heimilisvörur, jókst um 10,5% í október síðastliðnum miðað við sama mánuð í fyrra á breytilegu verðlagi. Þetta kemur fram á vef Rannsóknarseturs verslunarinnar. Á milli mánaðanna september og október jókst velta dagvöruverslunar um 2,2%, sem er breyting frá mánuðinum þar á undan en þá minnkaði veltan um rúmlega 9%. Verð á dagvöru hækkaði um 1% á milli mánaðanna samkvæmt verðmælingum Hagstofu Íslands.

„Þessar tölur benda til þess að Íslendingar séu ekki að hlusta á skilaboð Seðlabankans," segir Emil B. Karlsson, forstöðumaður Rannsóknaseturs verslunarinnar. Hann segir augljóst að stýrivaxtahækkanir Seðlabankans séu ekki að virka. „Í það minnsta ekki til skamms tíma, en svo veit maður ekkert hvað gerist þegar frammí sækir," segir Emil. Seðlabankinn hækkaði stýrivexti í byrjun mánaðarins og eru þeir nú 13,75%. „Fjármálaráðuneytið hefur verið að spá minni einkaneyslu en það er ekki í samræmi við okkar spár," segir Emil

Samkvæmt spám Rannsóknarsseturs verslunarinnar mun jólaverslun aukast um 9,4% frá fyrra ári.