Fengu nýja bók um þjóðskáldið

Forseti Íslands færði nemendum Þelamerkurskóla í Hörgárbyggð fyrstu eintökin af nýrri bók um Jónas Hallgrímsson í dag.

Það var fríður flokkur nemenda á Þelamörk norðan Akureyrar sem beið forseta Íslands í morgun. Krakkarnir höfðu sjálfir farið upp til fjalla og fundið birkihríslur sem þau notuðu sem fánastengur og fánana máluðu þau sjálf. Allt er þetta vegna 200 ára afmælis Jónasar Hallgrímssonar og dags íslenskrar tungu.

Þegar inn í skólann var komið afhenti forseti Íslands grunnskólabörnum fyrstu eintök nýrrar bókar um Jónas Hallgrímsson. Böðvar Guðmundsson skrifaði bókina og þótti vel við hæfi að Þelamerkurbörnin fengju fyrstu eintökin enda fæddist Jónas í sveitinni skammt frá.

Forseti Íslands, Ólafur Ragnar Grímsson, gat þess hve lánsöm börnin væru að alast upp í nágrenni við fæðingarstað skáldsins, Hraun í Öxnadal. Hann sagði æskuslóðirnar svo samofnar skáldinu að ekki yrði skilið á milli.Nokkur börn lásu ennfremur upp úr verkum Jónasar.

Nú síðdegis verður opnuð minningarstofa á Hrauni í Öxnadal. Frá því segir Stöð 2 í kvöldfréttum.