Íbúðalánasjóður hækkar vexti

Íbúðalánasjóður hefur hækkað vexti sína af íbúðalánum um 0,45 prósentustig.

Eftir því sem fram kemur á vef sjóðsins nema vextir á lánum með sérstöku uppgreiðsluálagi 5,30 prósentum en 5,55 prósentum á lánum án sérstaks uppgreiðsluálags. Íbúðalánasjóður bauð út íbúðabréf fyrir skemmstu og var vaxtaákvörðunin tekin að útboðinu loknu.

Íbúðalánasjóður tekur fram að allar gildar lánaumsóknir sem komu inn fyrir vaxtahækkunina, eða fyrir klukkan tíu í morgun, verði afgreiddar með eldri vöxtum.

Frá því í byrjun júní í sumar hafa vextir Íbúðalánasjóðs á lánum með uppgreiðsluálagi hækkað um 0,5 prósentustig.