Skapari.com horfin af Netinu

Heimasíðan skapari.com er ekki lengur í loftinu. Síðan hefur vakið mikið umtal síðustu dagana en þar var haldið úti áróðri fyrir kynþáttastefnu. Á síðunni var farið vægast sagt hörðum orðum um nafngreinda einstaklinga sem sagðir eru svikarar við hinn hvíta kynstofn og hefur lögreglan hafið rannsókn á málinu.

Friðrik Smári Björgvinsson, hjá lögreglunni á höfuðborgarsvæðinu fer með rannsókn málsins og hann segir að lögregla hafi ekki látið loka síðunni. „Hins vegar er ekki ólíklegt að fjölmiðlaumræðan og fréttir af því að við höfum hafið rannsókn á málinu hafi haft áhrif til þess að henni hefur nú verið lokað," segir Friðrik.

Hann segir rannsóknina í fullum gangi og meðal annars sé verið að kanna hvort lögreglan hafi lögsögu í málinu þar sem síðan er vistuð í Bandaríkjunum. Að sögn Friðriks hefur enginn þeirra nafngreindu einstaklinga sem nefndir eru á síðunni kært málið en þó hefur lögreglu borist fjöldi ábendinga.

„Það þarf ekki formlega kæru til þess að við förum í svona mál," segir Friðrik og bætir því við að hafi engin áhrif þótt síðunni hafi verið lokað. „Ef um brot er að ræða þá munum við halda rannsókninni áfram þrátt fyrir það og málið verður klárað," segir Friðrik Smári Björgvinsson.