Slökkviliðsbílar ná upp í hæstu hæðir

Slökkviliðsstjóri höfuðborgarsvæðisins segir lið sitt í stakk búið að bjarga fólki af efstu hæðum háhýsa svæðisins, þrátt fyrir að körfubílarnir nái aðeins upp á áttundu hæð. Vinnureglur varðandi eldsvoða í háhýsum eru í endurskoðun.

Byggingaverktakar leggja áherslu á að ná sem mestu byggingamagni, eins og það heitir, það er að fá sem flesta fermetra út úr hverju húsi og því reynt að byggja eins hátt og mögulegt er. Sem dæmi verður hús sem eigandi Rúmfatalagersins er að byggja á Smáratorgi 20 hæðir. Körfubílar slökkviliðsins ná upp í 28 metra hæð, en það er um það bil 7.til 8.hæð, en á þessari mynd af háhýsi á Kleppsholtinu sést hversu hátt körfubíll slökkviliðsins næði og hvaða hæðir væru þar fyrir ofan.

Jón Viðar segir að ef eldur kvikni hátt uppi, sé reynt að koma upp bækistöð eins hátt og hægt er, til dæmis á hæðinni fyrir neðan, enda skipti það líka máli fyrir reykkafara að þurfa ekki að ganga frá jarðhæð og upp á elleftu eða tólftu hæð.

Við þessar aðstæður gætu súrefniskútar reykkafarns verið tómir þegar hann kemur á vettvang. Jón Viðar segir að fólk ofan við eldinn, geti forðað sér út á svalir. Hann segir gömul háhýsi í Reykjavík uppfylla kröfur um eldvarnir og öryggi. Hann segir að nú standi yfir endurskoðun á vinnureglum slökkviliðsins varðandi útköll í háhýsi.