Tálbeitumál fyrir dómi

Jóhannes Kr. Kristjánsson ritstjóri Kompáss og Ingi R. Ingason framleiðandi þáttarins voru kallaðir til vitnis í morgun í Héraðsdómi Reykjavíkur vegna mála tveggja manna sem gengu í gildru þáttarins í vor. Mennirnir héldu að þeir væru að fara á fund 13 ára stúlku í kynferðislegum tilgangi.

Mennirnir tveir eru meðal annars ákærðir fyrir að hafa ætlað að hafa samræði við ólögráða einstakling. Forsaga málsins er sú að fréttaskýringaþátturinn Kompás setti auglýsingu á einkamal.is þar sem 13 ára gömul stúlka auglýsti eftir kynnum. Stúlkan var í raun 28 ára gömul kona, tálbeita Kompáss.

Málið vakti mikla umfjöllun á sínum tíma og spurningar um hvort lögregla ætti að hafa heimild til að beita tálbeitu í rannsóknum sínum. Rannsókn stendur enn yfir á þeim tveimur mönnum sem ekki eru ákærðir nú, meðal annars á máli Ágústs Magnússonar sem á þeim tíma sem þátturinn var gerður var að klára afplánun á Vernd fyrir kynferðisbrot gegn fimm drengjum.