Leiga á Höfðatorgi samþykkt

Borgarráð Reykjavíkur hefur samþykkt samning um sölu á fasteignunum að Borgartúni 1, Borgartúni 3, Skúlatúni 2 og Hverfisgötu 14-14a og leigu á skrifstofuhúsnæði að Borgartúni 10-12 fyrir framkvæmdasvið, skipulags- og byggingasvið, umhverfissvið og fleiri starfseiningar. Borgarráðsfulltrúar Vinstri grænna og F-lista létu bóka að vinnubrögðin við undirbúning málsins vektu tortryggni.

Í svari borgarstjóra við fyrirspurn frá síðasta fundi kom meðal annars fram að hann teldi engan grundvallarmun á þeirri aðferð sem nú væri höfð við sölu og leigu húsnæðisins en var þegar málið var í vinnslu hjá Reykjavíkurlistanum 2004 en gengið sé lengra í verðsamkeppni nú en þá.

„Það skýtur því skökku við að þeir kjörnu fulltrúar sem stóðu þannig að málum,“ segir í svarinu, „lýsi nú nánast sambærilegum vinnubrögðum sem forkastanlegum,“ segir í svari borgarstjóra.

Í svarbókun sinni bentu borgarráðsfulltrúar Samfylkingarinnar á að um algeran útúrsnúning á staðreyndum málsins væri að ræða í svari borgarstjóra. Ekki væri til dæmis svarað „með beinum hætti hver tók þá ákvörðun að ræða beint við Eykt en draga má þá ályktun að það hafi verið borgarstjóri“.