Sár og svekktur ef satt reynist

„Það hringdi í mig maður skömmu eftir að keppninni lauk og sagði að verðlaunamyndin væri fölsuð. Ég var með atvinnuljósmyndara í dómnefndinni sem gerði engar athugasemdir við hana,“ segir Sigurður Þ. Ragnarsson, veðurfréttamaður á Stöð 2, en að undanförnu hefur tölvupóstur gengið manna á milli þar sem því er haldið fram að sigurmynd veðurljósmyndakeppni Stöðvar 2 sé óekta.

„Ég stend alveg berskjaldaður gagnvart þessu og mér þykir þetta mjög sárt ef satt reynist,“ bætir Sigurður við.

Í tölvupóstinum er því haldið fram að fjall sem sjáist á myndinni sé alls ekki við Jökuls-árlón og að speglunin í vatninu í forgrunni gangi ekki upp. Það styðji þá hugmynd að ljósmyndin sé tekin í dagsbirtu en ekki að kvöldi. Sigurður útskýrir að ekki hafi verið neitt sem hafi bannað notkun á photoshop-ljósmyndaforritinu. „Ég ætla að ráðfæra mig við dómnefndina og yfirgrafíkerinn vegna þessa,“ sagði Sigurður.

Fréttablaðið hafði samband við Þorstein Ásgeirsson, ljósmyndarann sem tók sigurmyndina, og hann vísaði þessum fullyrðingum algjörlega á bug. „Einhverjir hafa verið að bera út gróusögur um að myndirnar í efstu sætunum séu falsaðar en mín er það ekki,“ lýsir Þorsteinn yfir. Hann segir myndina vera fjögurra ára gamla og að hún sé tekin í átt að brúnni. „Hið meinta fjall er sennilega einhver hluti af Öræfajökli,“ útskýrir Þorsteinn sem jafnframt segist varla kunna á photoshop-forritið. „Þetta er bara eitthvert rugl og sennilega bara sama gamla sagan, öfund,“ bætir hann við.