Sjötíu kíló á 10 mánuðum

Idolstjarnan fyrrverandi og Ólafsfirðingurinn Gísli Hvanndal Jakobsson hefur misst sjötíu kíló síðan hann fór í magaminnkunaraðgerð í maí á síðasta ári.

Gísli, sem verður 22 ára í sumar, átti lengi við offituvanda að stríða en ákvað að gera eitthvað róttækt í sínum málum og drífa sig í aðgerð. „Ég hef haldið þessu til streitu með því að vinna mikið og maður hefur svitnað mikið,“ segir Gísli, sem var 164 kíló áður en hann gekkst undir aðgerðina. „Mér líður frábærlega. Þegar maður fer í svona aðgerð þá þarf maður að taka allt inn eins og manni er sagt að gera og svo á maður að hreyfa sig vel. Þetta er bara megrun og þessi aðgerð er ætluð sem gott hjálpartæki. Með hreyfingu á þetta ekki að klikka,“ segir hann. „Það eru dæmi um að fólk hafi farið tvisvar í svona aðgerð og beðið um að fara í þriðja sinn. Þetta er engin töfralausn og það er mjög auðvelt að klúðra þessu.“

Gísli segir megrunina hafa átt hug sinn allan seinasta árið og því hafi tónlistin þurft að sitja á hakanum. Einnig hefur hann verið upptekinn á sjónum en núna starfar hann hjá smíðafyrirtæki. „Það kemur að því þegar maður er búinn að koma sjálfum sér í lag að fara gera einhverja hluti,“ segir hann um tónlistarferilinn. „Það er kominn tími á að gefa út plötu en maður hefur bara ekki verið í ástandi til að gera neitt.“

Þrátt fyrir að hafa misst sjötíu kíló á aðeins tíu mánuðum ætlar Gísli ekki að láta staðar numið. „Fólk segir í kringum mig að ég megi ekki missa meira en ég ætla að fara í ræktina og ná mér í meiri vöðva. Núna þegar maður er búinn að koma sér í form er ekkert því til fyrirstöðu að fara í ræktina.“

Í gær birtist grein frá Gísla í Fréttablaðinu þar sem hann gagnrýndi Íraksstríðið harðlega. Hann játar að vera pólitískur í hugsun og útilokar ekki að láta heyra frekar í sér á þessu sviði. „Þetta er eina greinin sem ég hef sent inn en ég er búinn að skrifa margar greinar fyrir sjálfan mig. Kannski á ég eftir að senda inn fleiri greinar,“ segir hinn gjörbreytti Gísli Hvanndal.